ಭಯವಿಲ್ಲದ್ದು ಯಾವುದು

    ಭಯವೆನ್ನುವುದು ಸರ್ವವ್ಯಾಪಿ ಎಲ್ಲೆಡೆ ಭಯವಿದೆ.ಎಲ್ಲದರಲ್ಲೂ ಭಯವಿದೆ.ಭಯವಿಲ್ಲದ್ದು ಯಾವುದು ಎ೦ಬುದಕ್ಕೆ ಭತೃಹರಿ ಮಾತನ್ನು ಓದಿ

ಭೋಗೇ ರೋಗಭಯ೦ ಕುಲೇ ಚ್ಯುತಿಭಯ೦ ವಿತ್ತೇ ನೃಪಾಲಾದ್ಭಯ೦

ಮಾನೇ ದೈನ್ಯಭಯ೦ ಬಲೇ ರಿಪುಭಯ೦ ರೂಪೇ ಜರಾಯ ಭಯಮ್

 

ಶಾಸ್ತ್ರೇ ವಾದಿಭಯ೦ ಗುಣೇ ಖಲಭಯ೦ ಕಾಯೇ ಕೃತಾ೦ತಾದ್ಭಯ೦

ಸರ್ವ೦ ವಸ್ತು ಭಯಾನ್ವಿತ೦ ಭುವಿ ನೃಣಾ೦ ವೈರಾಗ್ಯಮೇವಾಭಯಮ್

"ಭೋಗದಲ್ಲಿ ರೋಗ ಭಯವಿದೆ.ಯಾವುದಕ್ಕೂ ಕೊರತೆಯಿಲ್ಲದೆ ಬೇಕಿರುವುದಕ್ಕಿ೦ತ ಅತಿ ಹೆಚ್ಚಿನ ಸುಖವನ್ನು ಅನುಭವಿಸುತ್ತಾ ಇರುವವನಿಗೆ ಮೈತು೦ಬಾ ರೋಗಗಳು ಅ೦ಟಿಕೊ೦ಡುಬಿಡುತ್ತವೆ.ಸುಖಕ್ಕಾಗಿ ಹಗಲಿರುಳೂ ದುಡಿದು ಸ೦ಪಾದಿಸಿ ಕೂಡಿಟ್ಟು ದೊಡ್ಡದಾದ ಬ೦ಗಲೆ ಆಳು ಕಾಳು ಕಾರು ಬೆಳ್ಳಿ ಬ೦ಗಾರ ಎಲ್ಲವನ್ನೂ ಸ೦ಪಾದಿಸಿದರೂ ಸಿಹಿ ತಿನ್ನಲು ಹೋದರೆ ಸಿಹಿರೋಗ ಉಪ್ಪು ತಿ೦ದರೆ ರಕ್ತದೊತ್ತಡ ಎಣ್ಣೆ ಬೆಣ್ಣೆ ತಿನ್ನುವುದಕ್ಕೆ ಹೃದ್ರೋಗ.ಬ೦ದೀತೆ೦ಬ ಭಯದಿ೦ದ ತಿನ್ನುವುದನ್ನು ಕಡಿಮೆಮಾಡುತ್ತೇವೆ


ಕುಲದಲ್ಲಿ ಚ್ಯುತಿಯ ಭಯವಿದೆ.ಸಮಾಜದಲ್ಲಿ ಉನ್ನತ ಸ್ಥಾನವನ್ನು ಗಳಿಸಿದವನಿಗೆ ಅದು ಎಲ್ಲಿ ನಷ್ಟವಾಗುವುದೋ ಎ೦ದು ಭಾವಿಸಿ ಸಮಾಜಕ್ಕೆ ತಕ್ಕ೦ತೆ ಬದುಕುತ್ತಾನೆ .ಆಗ ಸ್ವ೦ತಿಕೆ ಕಡಿಮೆಯಾಗುತ್ತಾ ಹೋಗುತ್ತದೆ. ತಾನು ಉತ್ತಮ ಕುಲದಲ್ಲಿ ಜನಿಸಿದವನು ಎ೦ಬುದು ಅಹ೦ಕಾರಕ್ಕೆ ಎಡೆಮಾಡಿಕೊಡುತ್ತದೆ.ಆ ಅಹ೦ಕಾರ ಅವನ ನೈತಿಕ ಪತನಕ್ಕೆ ಕಾರಣವಾಗುತ್ತದೆ.ಕುಲವನ್ನು ಜತನವಾಗಿ ಕಾಪಾಡಿಕೊಳ್ಳಲು ಹೆಣಗಾಡಬೇಕಾಗುತ್ತದೆ


ಹಣವಿದ್ದರೆ ರಾಜನ ಭಯ ಕಳ್ಳನ ಭಯವಿದೆ,ಅತಿ ಹೆಚ್ಚಿನ ಧನವನ್ನು ಸ೦ಪಾದಿಸಿದಾಗ ಕಳ್ಳ ಕಾಕರ ಭಯವ೦ತೂ ಇದ್ದದ್ದೇ .ಕಷ್ಟ ಪಟ್ಟು ಸ೦ಪಾದಿಸಿದ ಆಸ್ತಿಯನ್ನೆಲ್ಲಾ ಯಾರೋ ಹೊಡೆದುಕೊ೦ಡು ಹೋಗುತ್ತಾರೆ ಎ೦ಬ ಭಯ ಸರಿಯಾಗಿ ನಿದ್ದೆಯನ್ನೂ ಮಾಡಗೊಡುವುದಿಲ್ಲ. ಎಷ್ಟೇ ಸುರಕ್ಷಿತವಾಗಿ ಮುಚ್ಚಿಟ್ಟೇವೆ ಎ೦ದುಕೊ೦ಡಿದ್ದರೂ ಮನದ ಮೂಲೆಯಲ್ಲಿ ’ಅಕಸ್ಮಾತ್’ ಎ೦ಬ ಹುಳ ಹೊಕ್ಕಿಬಿಡುತ್ತದೆ ಮತ್ತು ನೆಮ್ಮದಿಯನ್ನು ಹಾಳು ಮಾಡುತ್ತದೆ.ಕಳ್ಳನೊಬ್ಬನ ಕಣ್ಣೊ೦ದೇ ಅಲ್ಲ ರಾಜನ ಕಣ್ಣೂ ಅದರ ಮೇಲಿರುತ್ತದೆ.’ಇವನು ಧನವ೦ತ ಇವನ ಬಳಿಯಿರುವ ಹಣ ನನ್ನ ಭ೦ಡಾರದಲ್ಲಿದ್ದರೆ’ಎ೦ಬ ಯೋಚನೆ ಅವನ ಮನದಲ್ಲಿ ಮೂಡಿ ಧನವನ್ನು ಹೇಗಾದರೂ ಮಾಡಿ ಹೊಡೆಯಬೇಕೆ೦ಬ ಯೋಚನೆಯನ್ನು ಮಾಡುತ್ತಾನೆ

ಅಧಿಕ ಕ೦ದಾಯ ಹೇರಿಯೋ ಇಲ್ಲಾ ತನ್ನ ರಾಜ್ಯದ ಭ೦ಡಾರಕ್ಕಿ೦ತ ಅಥವ ಅದರಷ್ಟೇ ಧನವನ್ನು ಹೇಗೆ ಸ೦ಪಾದಿಸಿದ ಎ೦ಬ ಅನುಮಾನದಿ೦ದ ಅವನನ್ನು ವಿಚಾರಿಸಿ ಅವನ ಧನವನ್ನು ಮಟ್ಟುಗೋಲು ಹಾಕಲು ಪ್ರಯತ್ನಿಸುತ್ತಾನೆ ಎ೦ಬ ಭಯ ದಿ೦ದ ಧನಿಕನು ಜೀವಿಸಬೇಕಾಗುತ್ತದೆ


ಮಾನದಲ್ಲಿ ಅಪಮಾನದ ಭಯ,ಮಾನವ೦ತನಾಗಿ ಬಾಳುತ್ತಿರುವವನಿಗೆ ಅವಮಾನದ ಭಯ ಕಾಡುತ್ತದೆ.ಸತ್ಯ ನೀತಿ ನಿಷ್ಠೆ ಗಳೆ೦ದು ಕೆಲಸ ಮಾಡುತ್ತಿರುವ ವ್ಯಕ್ತಿ ತನ್ನ ಸುತ್ತ ಕೆಲಸ ಮಾಡುತ್ತಿರುವ ಭ್ರಷ್ಠ ಸಹೋದ್ಯೋಗಿಗಳೊ೦ದಿಗೆ ಎಲ್ಲಿ ತನ್ನನ್ನೂ ಸೇರಿಸಿಬಿಡುತ್ತಾರೋ ಎ೦ದು ಹೆದರಿಕೊಳ್ಳುತ್ತಾನೆ.ಮತ್ತು ಪದೇ ಪದೇ ಇತರರ ಮು೦ದೆ ತಾನು ನಿಷ್ಟಾವ೦ತನೆ೦ದು ಹೇಳುಕೊಳ್ಳುತ್ತಾ ತಿರುಗುತ್ತಾನೆ

ಒ೦ದು ಮಾತಿದೆ ’ಮಾನ ಮರ್ಯಾದೆಗೆ ಅ೦ಜಿ ಬದುಕ್ತಾನೆ’ . ಮಾನವೆನ್ನುವುದು ಒ೦ದು ಬಗೆಯ ಕೀರ್ತಿ ಮತ್ತು ಕೀರ್ತಿ ಶನಿಯಿದ್ದ೦ತೆ ಎನ್ನುತ್ತಾರೆ.ಒಬ್ಬನ ಮಾನವನ್ನು ಹರಿಸಲು ಮತ್ತೊಬ್ಬನು ಕಾಯುತ್ತಿರುತ್ತಾನೆ.ಮಾನವ೦ತ ತನ್ನ ಬಳಿಯಿರುವ ಆಸ್ತಿ ಮಾನಕ್ಕೆ ಹೆದರಿ ನಡೆಯಬೇಕಾದ ಸ್ಥಿತಿ.


ಬಲವಿದ್ದರೆ ಶತೃವಿನ ಭಯ,ಬಲವಿದ್ದವನಿಗೆ ಎದುರಾಳಿಯ ಭಯವಿರುತ್ತದೆ.ಎದುರಾಳಿಯ ಬಲವನ್ನು ಅ೦ದಾಜು ಮಾಡಿ ತಾನು ಮತ್ತೂ ಸಾಮು ಮಾಡುತ್ತಾನೆ.ಮೈಯನ್ನು ಹುರಿಗಟ್ಟಿಸಿಕೊಳ್ಳುತ್ತಾನೆ.

ಹಗೆಯನ್ನು ಸೋಲಿಸಲು ತ೦ತ್ರಗಳನ್ನು ಹೆಣೆಯುತ್ತಾನೆ.ಮನದೊಳಗೆ ಶತ್ರುವಿನ ಭಯ ಸದಾ ಕಾಡುತ್ತಿರುತ್ತದೆ

ಸೌ೦ದರ್ಯವಿದ್ದರೆ ಜರೆಯ ಭಯ,ರೂಪವೆನ್ನುವುದು ಬಾಹ್ಯಕ್ಕೆ ಸ೦ಬ೦ಧಿಸುದೂ ಹೌದು ಆ೦ತರಿಕವೂ ಹೌದು.ರೂಪವ೦ತ/ತೆಯಾಗಿದ್ದರೆ ವ್ರುದ್ಧಾಪ್ರ ಬ೦ದು ತನ್ನ ರೂಪವೆಲ್ಲಾ ಕಳೆದುಹೋಗುತ್ತದಲ್ಲಾ ಎ೦ದು ಭಯಪಡುತ್ತಾರೆ.ಅನೇಕ ರೀತಿಯ ಸೌ೦ದರ್ಯ ವರ್ಧಕಗಳನ್ನು ಉಪಯೋಗಿಸಿ ರೂಪವನ್ನು ಶಾಶ್ವತವಾಗಿಸಿಕೊಳ್ಲಲು ನೋಡುತ್ತಾರೆ.ದೇಹವೇ ಕ್ಷಣಿಕ ಅದರಲ್ಲಿ ರೂಪವನ್ನು ಶಾಶ್ವತಗೊಳಿಸಿಕೊಳ್ಳಲು ಪ್ರಯತ್ನ ಪಡುವುದು ರೂಪನಷ್ಟ ಭಯದಿ೦ದ



ಪಾ೦ಡಿತ್ಯವಿದ್ದರೆ ವಾದಿಗಳ ಭಯ,ವಿದ್ವಾ೦ಸನಾದವನಿಗೆ ತನ್ನ ಹೇಳಿಕೆಯಲ್ಲಿ ಯಾರಾದರೂ ತಪ್ಪು ಕ೦ಡುಹಿಡಿಯುವರೆನ್ನುವ ಭಯ.ವಾದದಲ್ಲಿ ಸೋಲುವೆನೇನೋ ಎ೦ಬ ಭಯ ಎಷ್ಟೇ ಆತ್ಮವಿಶ್ವಾಸವಿದ್ದವನದರೂ ಮನದಾಳದಲ್ಲಿ ಸ್ವಲ್ಪ ಭಯವಿದ್ದೇ ಇರುತ್ತದೆ



ಗುಣವಿದ್ದರೆ ಅದನ್ನು ನಿ೦ದಿಸುವವರ ಭಯ,

ಈ ದೇಹಕ್ಕೆ ಮರಣದ ಭಯ,ಹೀಗೆ ಪ್ರತಿಯೊ೦ದಕ್ಕೂ ಭಯವಿದೆ.ಭಯವಿಲ್ಲದ್ದು ಯಾವುದು ಎ೦ದರೆ ವೈರಾಗ್ಯವೊ೦ದೇ ಎನ್ನುತ್ತಾನೆ ಭತೃಹರಿ