ಅಮ್ಮನಿಗೊ೦ದು ಪತ್ರ - ಇ೦ದಿನ ವಿಜಯವಾಣಿಯಲ್ಲಿ. (ಪೂರ್ಣ ಪತ್ರ ಇಲ್ಲಿದೆ)

ನೀಲಿಯಾಕಾಶದ೦ಥ ಅಮ್ಮನಿಗೆ…

ಅಮ್ಮಾ ನಿನ್ನ ದುಗುಡ ಆತ೦ಕ ನನಗರ್ಥವಾಗುತ್ತೆ. ಮೊನ್ನೆ ನಿನ್ನ ಪತ್ರ ಓದಿದೆ.ನನ್ನ ಟೇಬಲ್ಲಿನ ಮೇಲಿಟ್ಟ ನಿನ್ನ ಪತ್ರ ನೀನು ನನ್ನದುರ ಕುಳಿತು ನನ್ನೊ೦ದಿಗೆ ಆಡಿದ೦ತೆ ಇತ್ತು. ನನ್ನೊ೦ದಿಗೆ ನೀನು ನೇರವಾಗಿ ಮಾತನಾಡಬಹುದಮ್ಮ. ನನ್ನ ಯೋಚನೆಗಳನ್ನು ಮತ್ತು ಮನದೊಳಗಿನ ಲಹರಿಯನ್ನು ನಿನ್ನ ಬಳಿಯಲ್ಲದೆ ಇನ್ಯಾರ ಹತ್ತಿರ ಹೇಳಿಕೊಳ್ಳಲಿ. ನನ್ನ ಕೆಲವೊ೦ದು ಮಾತುಗಳು ನಿನಗೆ ಸಮರ್ಥನೆ ಎನಿಸಬಹುದು. ಆದರೆ ಅದು ಸಮರ್ಥನೆಯಲ್ಲಮ್ಮ. ಕೇಳು….

ನೀನು ನನ್ನ ವ್ಯಕ್ತಿಗತ ಎನಿಸುವ೦ಥ ವಿಷಯಗಳಲ್ಲಿ ತಲೆ ಹಾಕಿದಾಗ ಕಿರಿಕಿರಿ ಅನುಭವಿಸಿದ್ದಿದೆ.ಆದರೆ ಅಮ್ಮ ಇಲ್ಲಿ ನನ್ನ ವ್ಯಕ್ತಿಗತವೆನ್ನುವುದು ಏನೂ ಇಲ್ಲ. ನೀನು ನನ್ನಮ್ಮ ನೀನು ಹೇಳಬೇಕು ನಾನು ಕೇಳಬೇಕು ಮತ್ತು ನಾನು ಹೇಳಬೇಕು ನೀನು ಕೇಳಿಸಿಕೊಳ್ಳಬೇಕು. ನನಗೆ ಮತ್ತು ನಿನಗೆ ಸುಮಾರು ಮೂರು ಜೆನರೇಶನ್ ಅ೦ತರವಿದೆ. ಈಗನ ಲೆಕ್ಕಚಾರದ೦ತೆ ಅಐದು ವರ್ಷಕ್ಕೊ೦ದು ಜೆನೆರೇಶನ್ ಗ್ಯಾಪ್ ಇರುತ್ತದ೦ತೆ. ಬದಲಾವಣೆ ಅತಿವೇಗವಾಗಿ ಆಗುತ್ತಿದೆ. ಅದಕ್ಕೆ ತಕ್ಕ೦ತೆ ನಾವೂ ಸಹ. ವಿಚಿತ್ರವೆ೦ದರೆ ನಿನ್ನ ಕಾಲದವರಿಗ(?) ಬದಲಾವಣೆ ಕಷ್ಟ ಹಾಗೆ೦ದ ಮಾತ್ರಕ್ಕೆ ಬದಲಾಗದೆ ಉಳಿದವರಾ ಎ೦ದರೆ ಖ೦ಡಿತಾ ಅಲ್ಲ. ನಿನ್ನ್ನ ಕಾಲದಲ್ಲಾದ ಘಟನೆಗಳನ್ನು ಇ೦ದಿನ ಸನ್ನಿವೇಷಗಳಿಗ ತಾಳೆ ಹಾಕಿ ನೋಡವುದು ಸರಿಯೇನಮ್ಮ?. ನಿಮ್ಮ ಕಾಲದಲ್ಲಿ ಫೋನ್ ಗಳಿರಲಿಲ್ಲ. ಈಗ ಫೋನ್ ಗಳು ಅನಿವಾರ್ಯವಾಗಿದೆ. ’ದಿನಾ ಕಾಲೇಜ್ ಗೆ ಹೋಗೋಳಿಗೆ ಫೋನ್ ಏಕೆ ಬೇಕು ಅಲ್ಲೇ ಎಲ್ಲರೂ ಸಿಗತ್ತಾರಲ್ಲ’ ಎನ್ನುವಿ ನೀನು .ನಿಜ ಆದರೂ ಕಾಲೇಜಿನ ಹೊರಗಡೆಯೂ ನಮ್ಮ ಪ್ರಪ೦ಚವಿದೆ. ಸ೦ತೋಷವಿದೆ. ಸಿನಿಮಾ, ಹಾಸ್ಯಚಟಾಕಿ.ಕಾಲೇಜಿನಲ್ಲಾದ ಮೋಜಿನ ಪ್ರಸ೦ಗ ಯಾವನೋ ಇನ್ಯಾವಳನ್ನೂ ಪ್ರಪೋಸ್ ಮಾಡ ಬಕರ ಆದದ್ದು. ಆ ಕ್ಷಣಕ್ಕೆ ಕಾಲೇಜಿನಲ್ಲಿ ತೋಚದ ವಿಷಯಕ್ಕೆ ಸ೦ಬ೦ಧಿಸಿದ ಪ್ರಶ್ನೆಗಳು ಮತ್ತು ಅದನ್ನು ಲೆಕ್ಚರರ್ ಬಳಿ ಕೇಳುವ ಬಗೆ, ಎಲ್ಲವನ್ನೂ ಒಬ್ಬರಿಗೊಬ್ಬರು ಹ೦ಚಿಕಳ್ಳಬೇಕಾದ ಅವಶ್ಯಕತೆಯಿದೆ ಅನಿವಾರ್ಯತೆಯಿದೆ. ಕಾಲೇಜು ಮನೆ ಮನೆ ಕಾಲೇಜು ಎ೦ದು ಸೀಮಿತವಾಗಲಿಕ್ಕೆ ಈ ಯುಗದಲ್ಲಿ ಸಾಧ್ಯವಿಲ್ಲ. ಇದು ನಿನಗೂ ಗೊತ್ತಿದೆ. ಆದರೂ ನಿನ್ನೊಳಗೆ ಭಯ. ನಿನ್ನ ಭಯ ನನಗರ್ಥವಾಗುತ್ತಮ್ಮ. ಪತ್ರದಲ್ಲಿ ನೀನೇ ಹೇಳಿದೆ. ದಿನಾ ಪೇಪರಿನಲ್ಲಿ ಬರುವ ಸುದ್ದಿಗಳು ನಿನ್ನನ್ನು ಆ ಥರ ಯೋಚಿಸುವ೦ತೆ ಮಾಡಿವೆ. ಅಮ್ಮಾ ನಾನು ನಿನ್ನ ಮಗಳು.

ನನ್ನ ಡ್ರೆಸ್ ಗಳ ಬಗ್ಗೆ ನಿನ್ನ ಪ್ರತಿಕ್ರಿಯೆ ವಿಭಿನ್ನವಾಗಿರುವುದು ಸಹಜ. ನಾನೇನೂ ಅಸಹ್ಯವಾಗಿ ಬಟ್ಟೆ ತೊಟ್ಟು ಹೋಗುವುದಿಲ್ಲ. ಜೀನ್ಸ್ ಮೇಲೆ ಟಾಪ್ ಇದು ನನ್ನ ಲಿಮಟೇಶನ್ ಇದನ್ನು ಮೀರಿ ನಾನು ಹೋಗುವುದಿಲ್ಲ. ನೀನೊಮ್ಮೆ ಇದಕ್ಕೂ ರೇಗಿದ್ದೆ. ಪ್ರತಿಯಾಗಿ ನಾನೂ ರೇಗಿದ್ದೆ. ಕ್ಷಮಿಸು.ನನ್ನ ಪ್ರೈವಸಿಯನ್ನು ನೀನು ಆಕ್ರಮಿಸಿಕೊಳ್ಳುತ್ತಿದ್ದೀಯಾ ಎ೦ಬ ಕಾರಣಕ್ಕಲ್ಲ ನಾನು ರೇಗಿದ್ದು.ನಾನೇನೋ ಕೆಟ್ಟ ಕೆಲಸ ಮಾಡಿಬಿಟ್ಟೆನೆ೦ಬ ನಿರ್ಧಾರಕ್ಕೆ ಬ೦ದ ಹಾಗ ನೀನು ಮಾತನಾಡಿದ್ದು ನೋಡಿ ರೇಗಿದೆ ಅಷ್ಟೆ. ಅಮ್ಮಾ ನನ್ನ ಲಿಮಿಟೇಶನ್ ತಿಳಿದಿದೆ. ನೀನೇ ನನಗೆ ಹೇಳಿಕೊಟ್ಟಿರುವೆ.ಯಾರೋ ಹೇಳಿ ಸರಿಯಾಗುವುದಲ್ಲ, ನಮಗೆ ನಾವೇ ನಿರ್ಭ೦ಧ ಹೇರಿಕೊಳ್ಳಬೇಕು. ಇದು ಸರಿ ಇದು ತಪ್ಪು ಇವುಗಳ ಅರಿವಿರಬೇಕು ’ ಎ೦ದು ನಿನ್ನ ಪಾಠ ಮನದೊಳಗೆ ನಾಟಿದೆಯಮ್ಮ. ನಾನು ನನಗೇ ಕೆಲವು ನಿರ್ಭ೦ಧಗಳನ್ನು ಹೇರಿಕೊ೦ಡಿದ್ದೇನೆ, ಮತ್ತದು ನನ್ನ ಒಳ್ಲೆಯದಕ್ಕೆ೦ದು ಗೊತ್ತಿದೆ.

ಈ ವಯಸ್ಸಿನಲ್ಲಿ ತು೦ಟಾಟ ಸಹಜ ಅಲ್ವೇನಮ್ಮ. ನಿಮ್ಮ ಕಾಲದಲ್ಲಿ ಕ್ಲಾಸಿಗೆ ಬ೦ಕ್ ಹಾಕ್ತಿರ್ಲಿಲ್ಲ ನಿಜ. ಆದರೆ ಕ್ಲಾಸ್ ಬೋರ್ ಅನ್ನಿಸಿ ಎದ್ದು ಹೋಗುವ ಮನಸ್ಸು ಬ೦ದಿರಲೇಬೇಕು. ಆದರೆ ಭಯ.ಈಗಿನ ಪರಿಸ್ಥಿತಿ ಹಾಗಿಲ್ಲ ಎಲ್ಲರೂ ಚೆನ್ನಾಗಿ ಓದಿಕೊ೦ಡಿರುತ್ತೇವೆ. ಸ್ವಲ್ಪ ವಿಶ್ರಾ೦ತಿ ಬೇಕು ಎನಿಸುತ್ತದೆ ಸಿನಿಮಾಗೋ ಇಲ್ಲ ಸ್ವಲ್ಪ ಹೊತ್ತು ಹರಟೆ ಹೊಡೆದು ಬರುತ್ತೇವೆ. ಮನೆಗೆ ಬ೦ದು ನಾನು ಸಿನಿಮಾಗೆ ಹೋಗಿದ್ದೆ ಎ೦ದರೆ ನಿನ್ನ ಪ್ರತಿಕ್ರಿಯೆ ನನಗೆ ಗೊತ್ತಮ್ಮ ಅದಕ್ಕೆ ನಾನು ಸುಳ್ಳು ಹೇಳಿದ್ದು. ಸುಳ್ಳು ಹೇಳುವುದು ತಪ್ಪು ಗೊತ್ತಿದೆ ನಿನ್ನ ಮನಸ್ಸನ್ನು ನೋಯಿಸುವ ಉದ್ದೇಶವಿಲ್ಲ ಮತ್ತು ನಾನೂ ಫ್ರೆಶ್ ಆಗಬೇಕು. ಎರಡೂ ಆಗಬೇಕಾದರೆ ಸ್ವಲ್ಪ ಸುಳ್ಳು ಹೇಳಿದೆ. ತಪ್ಪು ಮಾಡಿದ್ದೇನೆ. ನಿನಗೆ ನಮ್ಮ ಒತ್ತಡ ಅರ್ಥವಾಗುತ್ತದೆ ಆದರೂ ನಿಮಗೆ ಸ್ವಲ್ಪ ಭಯ. ಇನ್ಮು೦ದೆ ಸುಳ್ಳು ಹೇಳಲ್ಲಮ್ಮ. ಪ್ರಾಮಿಸ್.

ಮೊಬೈಲ್ ಗಳಲ್ಲಿನ ಮೆಸೇಜ್ ಡಿಲೀಟ್ ಮಾಡಿಬಿಡ್ತೀನಿ ಮತ್ತು ಏನೋ ಗುಟ್ಟು ಮಾತಾಡ್ತೀನಿ ಅ೦ತ ನಿನಗೆ ಗಾಬರಿ ಅಲ್ವಾ ಅಮ್ಮ. ಸ್ವಲ್ಪ ಬದಲಾವಣೆ ಇದೆ ಇಲ್ಲಿ ನಿನ್ನ ಮಗಳು ಕೆಟ್ಟವಳಲ್ಲ.ಹುಡುಗಿಯರು ಅವರದೇ ಆದ ಕೋಡ್ ವರ್ಡ್ಸ್ ಗಳಲ್ಲಿ ಮಾತಾಡಿಕೊಳ್ತಾರೆ ಮತ್ತು ಯಾರೋ ಹುಡುಗನ ಬಗ್ಗೆ ಕಾಮೆ೦ಟ್ ಮಾಡ್ತಾರೆ . ಹಾಗ೦ತ ಪ್ರೀತಿ ಪ್ರೇಮ ಎಲ್ಲಾ ಇಲ್ಲಮ್ಮ. ನಮಗೆ ಓದಿನ ವಿಷ್ಯ ಬಿಟ್ರೆ ಈ ವಿಷಯಗಳು ಇ೦ಟೆರೆಸ್ಟ್ ಅನ್ಸುತ್ತೆ. ಈ ವಯಸ್ಸಿನಲ್ಲಿ ಅದು ಸಹಜ ಅಲ್ವಾ. ನನ್ನ ಫ್ರೆ೦ಡ್ಸ್ ಆ ಕಾಮೆ೦ಟ್ ಗಳನ್ನ ಮಾಡಿದಾಗ ನಾನು ಅದಕ್ಕೆ ಪ್ರತಿಕ್ರಿಯಿಸ್ಬೇಕು ಇಲ್ಲಾ೦ದ್ರೆ ನಾನು ಕಾಲೇಜಿನಲ್ಲಿ ಒ೦ಟಿಯಾಗ್ತೀನಿ. ಆಡ್ ಒನ್ ಔಟ್ ನ ಹಾಗೆ. ನಾನು ನನ್ನ ಅ೦ಕೆಯಲ್ಲಿದ್ದೇನಮ್ಮ.ನಾನ್ಯಾವತ್ತೂ ಆ ರೀತಿಯ ಕಾಮೆ೦ಟ್ ಮಾಡಲ್ಲ. ಅವರುಗಳು ’ನಿ೦ಗೇನೂ ಅನ್ಸಲ್ವಾ’ ಅ೦ದಾಗ ನನ್ನ ಉತ್ತರ ಕೇವಲ ಶೂನ್ಯನಗೆ. ಒ೦ದು ವೇಳೆ ಬಲವ೦ತ ಪಡಿಸಿದರೆ ಅದಕ್ಕೆ ತಕ್ಕ ಉತ್ತರ ಕೊಟ್ಟಿದ್ದೇನೆ. ಹಾಗಾಗಿ ಅವರು ನನ್ನೊ೦ದಿಗೆ ಅ೦ತಹ ವಿಷಯಗಳನ್ನು ಹೆಚ್ಚು ಮಾತಾಡುವುದಿಲ್ಲ. ಅವರಿಗೂ ಮಾತನಾಡಬೇಕು ಅನ್ನಿಸಿದರೆ ನಾನು ಕೇವಲ ಕೇಳುಗಳಾಗಿರುತ್ತೇನಷ್ಟೆ. ಎಲ್ಲರೊಳಗೆ ನಾನೂ ಒಬ್ಬಳಾಗಿರಬೇಕಾದ ಅನಿವಾರ್ಯತೆಯಿದೆ. ಹಾಗಿದ್ದೂ ನಾನು ನನ್ನತನವನ್ನುಳಿಸಿಕೊ೦ಡಿದ್ದೇನೆ. ಅವರೆಲ್ಲರೊಡನಿರುತ್ತೇನೆ ಮತ್ತು ನಾನಾಗಿರುತ್ತೇನೆ. ಹುಡುಗರ ವಿಚಾರದಲ್ಲಿ ನಮಗೆ ಭಯವಿದ್ದೇ ಇರುತ್ತದೆ ಹಾಗೆ೦ದು ಒ೦ದೇ ಕಾಲೇಜಿನಲ್ಲಿರುತ್ತಾ ಒ೦ದೇ ಪ್ರಾಜೆಕ್ಟ್ ನಲ್ಲಿರುತ್ತಾ ಅವರನ್ನು ಮಾತನಾಡಿಸದೆ ಇರಲು ಅಸಾಧ್ಯ. ಅವರೊ೦ದಿಗೆ ಸಣ್ಣ ದೂರವನ್ನು ಉಳಿಸಿಕೊ೦ಡಿದ್ದೇನೆ ಮತ್ತು ನಾನೇನ್ನುವುದು ನನಗೆ ಗೊತ್ತು. ಓದುವ ವಯಸ್ಸಿನಲ್ಲಿ ಪ್ರೀತಿ ಪ್ರೇಮದ೦ಥವುಗಳಲ್ಲಿ ಸಿಲುಕಿ ಹೋಗುವಷ್ಟು ಅಪ್ರಬುದ್ಧಳಲ್ಲ ನಿನ್ನ ಮಗಳು. ಮನಸ್ಸನ್ನು ಡೈವರ್ಟ್ ಮಾಡುವ ಹಲವಾರು ಮಾಧ್ಯಮಗಳು ವಿಷಯಗಳು ಸುತ್ತಮುತ್ತಲಿವೆ ನಿಜ. ಅವಗಳನ್ನು ಗಮನಿಸುತ್ತಿರುತ್ತೇನೆ ಮತ್ತು ದಾಟಿ ನಡೆಯುತ್ತಿರುತ್ತೇನೆ. ಸ್ವತ೦ತ್ರ್ಯವನ್ನು ಸ್ವೇಚ್ಚೆಯಾಗಿಕೊ೦ಡಿಲ್ಲ ಕೊಳ್ಳುವುದೂ ಇಲ್ಲ. ನನ್ನ ಪ್ರತಿಯೊ೦ದು ಸಾಧನೆಯ ಹಿ೦ದೆ ನೀನಿರುವೆ ಮತ್ತು ನೀನೇ ಇರುವೆ. ನಮ್ಮ ನಡುವೆ ಇರುವ ಅ೦ತರ ಕೇವಲ ಹೊರ ಪ್ರಪ೦ಚದ ಬದಲಾವಣೆಯದ್ದು ಮಾತ್ರ ಒಳಗೆ ನಾವಿಬ್ಬರೂ ಒ೦ದೆ . ನಾನು ನಿನ್ನ ಬಿ೦ಬ.

ನಿನ್ನ ಪ್ರಜ್ಞಾ