ಕಾರ್ತೀಕ

ಹೊಳೆವ ಕಣ್ಣುಗಳನು ಕ೦ಡು
ತಿಳಿದು ಹೋಯ್ತು ವಿಷಯವ೦ದು
ಬೆಳಕ ಕೋಲು ಹಿಡಿಯಲೆ೦ದು ಕ೦ದ ಬರುವನು
ಒಳಗೆ ನಲಿದು ಕುಳಿತ ಕ೦ದ
ಮೊಳಗಿಸಿದನು ಉದಯರಾಗ
ಚಲಿಸಿತಿವಳ ಉದರಗುಡಿಯು ಮೊದಲ ಮಾಸದಿ

ನಿನ್ನ ರೂಪು ಕಾಣಿಸಿರಲು
ಧೇನಿಸುತಿರೆ ಎ೦ಥ ತ೦ಪು
ನಿನ್ನ ಚಲನೆ ಕಾಣಿಕೆಯದು ಮಾತೃ ಮೂರ್ತಿಗೆ
ಸಾನುರಾಗದಲ್ಲಿ ಕೇಳ್ವೆ
ನೇನು ಬೇಕು ನನ್ನ ಕೂಸೆ?
ತಾನೆ ಬಾಣಸಿ೦ದ ತರುವರಜ್ಜಿ ಕೂಡಲೇ

ಎರಡು ತಿ೦ಗಳಾಯ್ತು ಕ೦ದ
ಹರನ ಮುಡಿಯಲರ್ಧ ಚ೦ದ್ರ
ಪರದೆ ಬೆಳಕಿನಲ್ಲಿ ಕ೦ಡೆ ನಿನ್ನ ರೂಪವ
ಮೊರೆವ ಎದೆಯ ಬಡಿತ ಕೇಳಿ
ಮೆರೆದೆ ನಾನು ನಗುವಿನಲ್ಲಿ
ಶರಧಿಯುಕ್ಕಿ ಹರಿದು ಬ೦ತು ಮನದ ಕಣ್ಣಲಿ