ಮದುವೆ_ಲಹರಿ_ಕವನ

೧
ಸಿರಿಗೌರಿ ಬರುತಿಹಳು ನನ್ನೆದೆಯ ಕಡೆಗೆ
ತಿರುತಿರುಗಿ ನೋಡುವಳು ತೌರೂರ ಕಡೆಗೆ
ಗಟ್ಟಿಗೊಂಡಿಹುದೇನೋ ಸಂಕಟವು ಒಳಗೆ
ಭುಜಕೊರಗಿ ಮಲಗಿಹಳು, ಮಲ್ಲಿಗೆಯು ಮುಡಿಗೆ
೨
ಉಂಗುರದ ಬೆರಳೊಳಗೆ
ಬಂಗಾರದುಂಗುರವು
ಕಂಗೊಳಿಸಿ ಕರೆಯುತಿದೆ
ಮಲ್ಲಿಗೆಯ ವಧುವನ್ನು, ಮೆಲ್ಲುಲಿಯ ಸಖಿಯನ್ನು
೩
ಹೆಗಲಿಗೊರಗಿದೆ ನೀನು
ಹೆಗಲಾಗಲು ಬರುವೆಯಾ
ಹಗಲಿರುಳು ಪ್ರೀತಿಸುವೆ
ಜಗವಾಗಲು ಬರುವೆಯಾ
೪
ದೇಗುಲದ ತುಂಬೆಲ್ಲ ಘಂಟೆಗಳ ನಾದ
ಅಂಗಳದ ತುಂಬೆಲ್ಲಾ ಮಲ್ಲಿಗೆಯ ಕಂಪು
ಬಂಗಾರ ತೇರೊಳಗೆ ಶ್ರೀಲಕ್ಷ್ಮಿ ಮೂರ್ತಿ
ಕಂಗೊಳಿಪ ಸಿರಿಗೌರಿ ನೀನೆಮ್ಮ ಕೀರ್ತಿ
೫
ಎದೆಯ ಮೇಲೆ ಕುಣಿದ ಕೂಸು
ಅಳಿಯನೊಡನೆ ಹೊರಟಿದೆ
ಹಿತ್ತಲಲ್ಲಿ ಮಲ್ಲೆ ಬಳ್ಳಿ
ಮೌನದಲ್ಲಿ ಅಳುತಿದೆ
ಮನೆಯ ಮುಂದೆ ರಂಗವಲ್ಲಿ
ಬಾನಿನೊಡನೆ ಸಾಗಿದೆ
ಹೊಸ ಮನೆಯ ಅಂಗಳದಲಿ
ಚಿತ್ತಾರವ ಬಿಡಿಸಿದೆ
೬
ತವರೂರ ಅಂಗಳದಿ ನೆನಪುಗಳ ಬಳ್ಳಿ
ಕೂಸು ಕೊಂಗಾಟದ ಮಾತುಗಳೆ ಅಲ್ಲಿ
ತಮ್ಮನೊಡನಾಟವನು ನೆಟ್ಟು ಬಂದಿಹೆನಲ್ಲಿ
ಅಳುತಿಹುದೋ ಏನೋ ಮಲ್ಲಿಗೆಯ ಬಳ್ಳಿ
೭
ಕಾದಿರುವೆ ಕಾರ್ತೀಕ ದೀಪಗಳಿಗಾಗಿ
ಚೆಂಬೆಳಕ ನೀಡುವ ಪ್ರಣತಿಗಳಿಗಾಗಿ
ಹೊರಟಿಹೆನು ಸವಿಯೂರ ಹೊಸಪರ್ವದೆಡೆಗೆ
ಕೈಮುಗಿದು ನಮಿಸುವೆನು ತೌರೂರ ಕಡೆಗೆ
೮

ನಿಮಗವಳು ಮಗಳು
ಎಮಗವಳು ಬೆಳಕು
ಹರಸಿ ನಮ್ಮಿಬ್ಬರನು
ಹಸಿರಾಗಲಿ ಬದುಕು
ಅಳುತ ನಿಲ್ಲದಿರಿ ಮಾವನವರೆ

ಮಲ್ಲಿಗೆಯ ಬೆಳಸಿದಿರಿ
ಒಲವೆರದು ಕಾಯುವೆನು
ಚೆಲುವಾಗಲೀ ಬದುಕು
ನಲಿವೊಂದೆ ನೀಡುವೆನು
ಅಳುತ ಕಳುಹದಿರಿ ಅತ್ತೆಯವರೆ

೯

ತೇಲಿಬಿಡುವೆ ಮುತ್ತುಗಳನು
ತುಂಗೆಯೂರ ದಂಡೆಯೆಡೆಗೆ
ಹಣತೆ ಸಾಲು ತೇಲಿ ಬರಲಿ
ಬಯಲು ಸೀಮೆ ಮುಗಿಲ ಕಡೆಗೆ

೧೦

ನೀ ಹೊರಟ ಪಯಣದೊಳು
ಜೊತೆ ನಾನು,ಪಯಣಿಗನು
ಏರುವೆನು ಇಳಿಯುವೆನು
ಬಾಳ್ಗನಸು ಕಾಣುವೆನು